Page 181 - Tailoring Electrospinning Techniques for Regenerative Medicine - Marc Simonet

pli gronda sa sposta il modul da las tangentas da questas puntanadas en la medema dimensiun sco il modul da las tangentas da tessì lom natiral sco p.ex. d’avainas.
Fertant che tant las caracteristicas fisiologic- mecanicas sco era la porusitad gronda èn empermettentas per il diever da l’inschigneria da tessids, è la controlla da la distanza spaziala da las fibras, l’uschenumnada grondezza da las poras, in element decisiv per l’adesiun, la proliferaziun e la migraziun da las cellas. Sa basond sin ina retscha da puntanadas filadas electronicamain a temperatura bassa or da polilactids e policaprolactons han ins constatà che la fermezza da las fibras permetta ina controlla considerabla da las distanzas spazialas da la puntanada. Ulteriurs avantatgs èn la simplicitad dal process ed il fatg ch’ins na dovra naginas chemicalias supplementaras. La metoda è plinavant robusta, premess che l’umiditad da l’aria restia sur 30% e na saja betg limitada a materials sintetics u furmas da puntanadas specificas.
La segunda part da la lavur sa concentrescha sin il diever e la funcziunalitad da puntanadas filadas electronicamain per sviluppar in-situ tessì da las clappas dal cor. Per quest tip particular da l’inschigneria da tessids èn necessarias puntanadas cun ina structura biomecanica e spaziala adattada per garantir la funcziunalitad immediata e la robustadad mecanica e per pussibilitar l’infiltraziun cellulara. In material sintetic che consista da PCL- bisurea na mussa nagins segns da strapatsch suenter
passa 3 milliuns ciclus cun in’elasticitad da 10% ed è uschia in material sintetic empermettent per quest diever. Las clappas dal cor filadas electronicamain e furmadas or dad in cilinder chavortg medemamain filà electronicamain han mussà ina buna prestaziun hemodinamica durant 20 uras en in duplicatur dal puls tar cundiziuns “supra-pulmonaras” (50/25 mmHg). Plinavant han ils ventils mussà ina funcziunalitad immediata en in model da nursa ed in’infiltraziun cellulara e suenter ina producziun da collagen fin 5 emnas. Perquai che la puntanada da material sintetic sa decumpona memia spert, han las clappas dal cor però disditg suenter 4 fin 5 emnas. Malgrà ch’igl è necessari da franar la decumposiziun dal material sintetic, cumprovan quests resultats che l’inschigneria da tessids in-situ da clappas dal cor cun puntanadas polimeras filadas electronicamain èn ina buna basa per producir protesas da clappas dal cor viventas.
Per finir pudain nus constatar che cundiziuns stabilas dal clima circumdant megliereschan considerablamain la reproducibladad da la tecnica dal filar electronic e novas metodas pussibiliteschan d’imitar pli exactamain la MEC e da meglierar la funcziunalitad da questas puntanadas da fibras. Questa lavur mussa plinavant era che puntanadas filadas electronicamain han in grond potenzial era per champs fitg pretensius sco l’inschigneria da tessids in-situ.
Translation to Romansh by the orgaization Lia Rumantscha
179